ជាអកុសល មានជំនឿខុសទំនងជាច្រើនដែលថ្លែងតៗគ្នាមកថា ស្រ្ដីរួមភេទច្រើនលើកច្រើនសា ក៏អាចធ្វើឲ្យប្រដាប់ភេទរីកធំបានដែរ។ ជាទូទៅនៅដើមអាយុ៣០ឆ្នាំ ប្រដាប់ភេទស្រ្ដីចាប់ផ្ដើមយារធ្លាក់បន្ដិចម្ដងៗ។
យ៉ាងណាមិញនៅក្នុងចំណោមកត្តាទាំងនោះអ្វីដែលធ្វើប៉ះពាល់ ខ្លាំងនោះ គឺនៅពេលប្រសូតកូន។ អ្នកផ្ដល់កំណើតកូនកាន់តែច្រើន ប្រដាប់ភេទកាន់តែរីកយារធំ។ នេះដោយសារតែសាច់ដុំចុះទ្រុឌទ្រោមព្រមទាំងជាលិកាទ្រទ្រង់គែម ប្រដាប់ភេទផ្សេងៗទៀត។ វាកាន់តែជារឿងធម្មតាទៅទៀតក្រោយពេលការឆ្លងទន្លេដ៏លំបាកនិង មាន រយៈពេលប្រឹងយូរ។ ទោះយ៉ាងណាក៏ដោយ ការយារធ្លាក់នេះប្រដាប់ភេទអាចទប់ស្កាត់បានតាមរយៈការព្យាបាល ដោយលំហាត់ប្រាណសាច់ដុំផ្លូវភេទយ៉ាងទៀងទាត់ក្រោយឆ្លងទន្លេ ដែលពេទ្យឆ្មបនិងគ្រូពេទ្យបានណែនាំ។ ថ្វីដ្បិតតែវាទាមទារនូវការអំណត់អត់ធ្មត់ខ្ពស់ ប៉ុន្តែវានឹងធ្វើឲ្យយោនីវិលមករកភាពតឹងណែន ដែលជាគន្លឹះដែលអាចផ្ដល់សេចក្ដីសុខផ្លូវភេទដល់ដៃគូផងដែរ។
តើអ្វីទៅជាលំហាត់ប្រាណ ខេហ្គាល (Kegel)? ហើយវាអាចជួយបន្ដឹងប្រដាប់ភេទធំយារបានដែរឬទេ?
ការយារធ្លាក់ ឬធូររលុងនៃយោនី គឺជារឿងសាមញ្ញសម្រាប់ស្រ្ដីដែលបានឆ្លងទន្លេរួច។ យ៉ាងណាមិញ មានលំហាត់ប្រាណច្រើនយ៉ាងដែលអ្នកអាចធ្វើដើម្បីបន្ដឹងនូវភាព យារធ្លាក់ប្រដាប់ភេទរបស់អ្នកឡើងវិញ។ លំហាត់ប្រាណដែលស្រាវជ្រាវរកឃើញដោយវេជ្ជបណ្ឌិតជនជាតិអាល្លឺម៉ង់ នេះអាចជួយបន្ដឹងដល់សាច់ដុំផ្លូវភេទ ដែលជាចំណុចសំខាន់បំផុតចំពោះការប្រព្រឹត្ដសិចរបស់អ្នក។ វាអាចជួយបង្កើនអារម្មណ៍ស្រើបស្រាល (ឈានដល់ទីជម្រៅនៃតម្រេក) ដោយធ្វើឲ្យសាច់ដុំណែននិងរឹងមាំ ហើយវាអាចបន្តឹងណែននូវរន្ធនោម ដូច្នេះអ្នកមិនអាចលេចនោមដោយឯកឯងនោះទេ។ ទោះជាយ៉ាងនេះក្ដី វាមិនអាចធ្វើឲ្យប្រដាប់ភេទរួមតូចជាងមុនបានទេ ប៉ុន្ដែវាអាចធ្វើឲ្យមាត់ទ្វារមាសរួមតូចនិងកាន់តែតឹងណែន។
ដើម្បីស្វែងរកសាច់ដុំខេហ្គាល(ឬសាច់ដុំផ្លូវភេទ) នៅពេលដែលអ្នកកំពុងតែបទជើងតូច ចូរសាកល្បងត្បៀតសាច់ដុំឲ្យណែន (កុំប្រើដៃជួយ) ដើម្បីបញ្ឈប់ទឹកនោមកុំឲ្យហូររយៈពេលប្រមាណ៤វិនាទី។ ក្រោយមកបន្ធូរសាច់ដុំមកវិញដើម្បីឲ្យទឹកនោមហូរតាមធម្មតា។ បើសិនជាអ្នកចង់ពិនិត្យមើលឲ្យជាក់ច្បាស់ថា អ្នករកឃើញទីតាំងសាច់ដុំខេហ្គាលនេះបានត្រឹមត្រូវទេចូរដាក់ ម្រាមដៃមួយឬក៏២ទៅក្នុងប្រដាប់ភេទដោយចាប់ផ្ដើមបន្តឹងសាច់ដុំ ឲ្យណែន។ បើសិនជាអ្នកមានអារម្មណ៍ថាម្រាមដៃត្រូវកៀប (សូម្បីតែបន្តិចក៏ដោយ) នោះហើយជាលំហាត់ប្រាណដ៏ត្រឹមត្រូវ។
អនុវត្ដបែបនេះរយៈពេលប្រមាណពី៥ទៅ១០ដងក្នុងមួយថ្ងៃ ដោយម្ដងៗត្រូវត្បៀតរួចបន្ធូរឲ្យបាន១០ដង។ វាទាមទាររយៈពេលពី ៨ ទៅ ១០ សប្ដាហ៍ដើម្បីទទួលបានប្រសិទ្ធភាព។ កត្ដាសំខាន់បំផុតនៃលំហាត់ខេហ្គាលគឺថាអ្នកអាចធ្វើវានៅពេលណាក៏ បាន ដូចជានៅក្នុងរថយន្ដ អំឡុងពេលប្រជុំដ៏ធុញទ្រាន់ ឬក៏នៅពេលដែលគេងក៏បានដែរ។
ភ្នំពេញប៉ុស្តិ៍